Varasöm hengja í vesturbrún Mosfells

Veðurstofa Íslands greinir frá því á vefsíðu sinni að varasöm hengja sé nú í vesturbrún Mosfells en staðkunnugur íbúi í Mosfellsbæ hafði samband við snjóflóðavaktina og kvaðst áhyggjur af hættu í vesturhlíð fjallsins.

Allstór og brattur skafl hefur myndast upp við fjallsbrúnina og kvaðst bæjarbúinn vita að þarna hefði fallið snjóflóð, til dæmis veturinn 1983 til 1984. Þarna hefði þá verði mikill skafl, mun meiri en nú, og þá hafi menn haft áhyggjur af snjóflóðum.

„Hann sagði þá sem ganga á fjallið oft fara frá á brúnina þarna að vestanverðu til þess að njóta útsýnis. Það geti verið mjög hættulegt nú vegna þess að hætta sé á að menn gangi fram á brún skaflsins sem er nú talsvert utan við hina eiginlegu fjallsbrún.

Meðfylgjandi ljósmynd sýnir þennan skafl í kvöldsólinni í dag og sést vel hversu brattur hann er og að rétt er að fara varlega á fjallstoppnum þótt almennt sé ekki mikill snjór í hlíðinni nema þarna.

Þetta  minnir á að skafsnjór safnast gjarnan á ákveðna staði þar sem ferðalöngum getur verið mikil hætta búin. Það þarf alltaf að gæta varúðar þegar farið er um fjöll að vetrarlagi,“ segir á vef Veðurstofunnar.