Fyrrum úr­vals­deildar­leik­maður eltir pílu­drauminn

Matthías Örn Friðriksson, fyrrum knattspyrnumaður, hefur undanfarin ár einbeitt sér að pílukasti og nú eltir hann drauminn.

Matthías Örn hefur leikið 233 leiki í meistaraflokki í knattspyrnu en 78 af þeim komu í efstu deild. Hann hefur leikið með Grindavík, Þór og GG á sínum ferli.

Hann lagði fótboltaskóna á hilluna í janúar á síðasta ári og einbeitti sér þá að pílukastinu.

Hann greinir frá því á Twitter-síðu sinni að nú sé hann á leiðinni til Þýskalands þar sem hann reynir að komast í úrvalsdeildina í pílukasti.

Á leið til Þýskalands að reyna að vinna mér þátttökurétt í deild þeirra bestu í heimi í pílukasti Ef þið smellið á plúsinn við nafnið mitt á linknum hérna getið þið fengið email í hvert skipti sem ég spila... https://t.co/VCJsVSuJUi

— Matthías Örn (@mattiorn) January 15, 2020

Erfitt verkefni bíður Matthíasar en pílukastið hefur vakið mikla athygli hér heima undanfarin ár.

Í byrjun janúar fór fram heimsmeistaramótið þar sem Snakebite, Peter Wright, stóð uppi sem sigurvegari.