Tilhæfulaus skattur innheimtur á tjaldsvæði

Breki Karlsson, formaður Neytendasamtakanna, segir að brögð séu að því að þeir sem reki tjaldsvæði innheimti gistináttaskatt en slíkt sé ólöglegt.

„Gistináttaskattur hefur verið afnuminn tímabundið og má því ekki innheimta,“ segir Breki en Neytendasamtökin hafa varað sérstaklega við slíkri rukkun.

„Árvökull félagsmaður Neytendasamtakanna sendi ábendingu um að tjaldsvæði haldi áfram innheimtu gistináttaskatts, þrátt fyrir að skatturinn hafi verið afnuminn tímabundið frá 1. apríl 2020 til loka árs 2021, sem hluti af efnahagspakka stjórnvalda í kjölfar kórónaveirufaraldursins,“ segir á síðu samtakanna.

Innheimtan var þegar tilkynnt til eftirlitsdeildar Skattsins.

Samtökin vilja benda ferðalöngum á að hafa varann á og greiða ekki tilhæfulausa skatta.