Martin og félagar nánast komnir í úrslitaleikinn í Þýskalandi

Martin Hermannsson og félagar hans í Alba Berlín eru skrefi nær úrslitaleiknum í Þýskalandi eftir að hafa unnið tæplega 30 stiga sigur á Oldenburg en lokatölur urðu 92-63 í fyrri leik liðanna.

Martin skoraði tólf stig, gaf sex stoðsendingar og tók sjö fráköst en Berlínar-liðið gerði út um leikinn í öðrum og þriðja leikhlutanum. Þeir unnu þá samtals með 22 stigum.

Síðari leikur liðanna fer fram á miðvikudaginn en í hinni viðureigninni gerðu Ludwigsburg og Ulm 71-71 jafntefli. Þau mætast einnig aftur á miðvikudaginn en Alba er nánast komið í úrslitaleikinn.