Vísbendingar um að landris sé hafið að nýju við Þorbjörn

Vísbendingar eru um að landris sé hafið að nýju við bæjarfjall Grindavíkur, Þorbjörn. Um er að ræða þriðja skiptið á árinu sem land tekur að rísa við fjallið.

Samkvæmt upplýsingum frá sérfræðingi Veðurstofunnar mun staðan skýrast betur í næstu viku en óvissustig er enn í gildi á svæðinu hjá Almannavarnadeild Ríkislögreglustjóra.

Dregið hefur úr skjálftavirkni á Reykjanesskaga undanfarnar vikur en rúmlega 120 jarðskjálftar mældust þar 20. – 27. maí sem er nokkuð minni virkni en í vikunni þar á undan. 

Stærsti skjálftinn mældist þá 2,1 að stærð og var miðja hans vestur af Reykjanestá samkvæmt upplýsingum af vef Veðurstofunnar.