Helena hætt hjá Fjölni eftir skamma dvöl

Helena Ólafsdóttir er hætt sem þjálfari kvennaliðs Fjölnis í fótbolta nú þegar aðeins rúmar þrjár vikur eru í að liðið hefji keppni á nýrri leiktíð í 1. deildinni.

Þetta kemur fram í fréttatilkynningu frá stjórn knattspyrnudeildar Fjölnis þar sem segir að stjórnin hafi samþykkt að verða við ósk Helenu um að láta af störfum. Þar segir einnig að vegna annarra verkefna hafi Helena ekki séð fram á að geta sinnt þjálfarastarfinu af fullum krafti í sumar, og tekið fram að Helena hafi til að mynda stýrt Pepsi Max-mörkum kvenna á Stöð 2 Sport.

Stjórn knattspyrnudeildar Fjölnis og meistaraflokksráð kvenna hafa nú hafist handa við að finna eftirmann Helenu, sem tók við Fjölni í nóvember síðastliðnum eftir að hafa síðast þjálfað ÍA á sínum langa þjálfaraferli. Axel Örn Sæmundsson aðstoðarþjálfari mun stýra Fjölnisliðinu tímabundið.