Raiola sagður hafa haft samband við Juventus varðandi Pogba

Mino Raiola, umboðsmaður Paul Pogba hjá Manchester United, er sagður hafa hafið viðræður við Juventus um möguleg kaup á umbjóðanda sínum í sumar.

Pogba hefur verið lengi orðaður burt frá Old Trafford og Frakkinn hefur verið nálægt því að fara frá United í síðustu tveimur gluggum en mikið hefur gustað um hann.

Real Madrid er sagt hafa mikinn áhuga á Pogba en ítölsku meistararnir, sem Pogba yfirgaf árið 2016 fyrir United, eru einnig sögðir áhugasamir.

Fjölmiðillinn Le10Sport greinir frá því að Raiola hafi haft samband við Juventus um möguleg félagaskipti í sumar. Juventus eru sagðir hafa áhuga og Pogba er talinn viljugur til að hlusta á öll tilboð frá gömlu félögunum.

Pogba lék með ítalska félaginu frá árinu 2012 til 2016. hann skoraði 34 mörk og lagði upp önnur 40 í 178 leikjum fyrir „Gömlu konuna“ á tíma sínum hjá félaginu.