Táraðist þegar hún hitti loks Ingu Lind eftir 25 ár

Þegar Inga Lind Karlsdóttir var 18 ára gerðist hún SOS-styrktarforeldri fimm ára stúlku í SOS barnaþorpinu í Greenfields á Indlandi.

Litla stúlkan, Sonia, hafði misst móður sína og faðir hennar gat ekki hugsað um hana vegna þess að hann var blindur. Inga Lind fylgdist með uppvexti Soniu næstu 14 árin í gegnum bréf og myndir sem styrktarforeldrar fá sendar tvisvar á ári.

Í Íslandi í dag í gærkvöldi fékk Sindri Sindrason að fylgjast með því þegar Inga Lind heimsótti Soniu og dóttur hennar til Indlands í fyrsta sinn en hún hélt út til Indlands í janúar á þessu ári.

Mikil tilfinningaleg tengsl

„Ég er ótrúlega spennt að fá að koma hingað og fara inn í þorpið,“ segir Inga Lind þegar hún var lent á Indlandi.

„Ég er búin að ímynda mér í 25 ára hvernig þetta liti allt saman út. Við höfum séð myndi frá SOS-barnaþorpunum en það er allt öðruvísi að koma hingað í alvörunni.“

Sonia er í dag þrítug og á eina stúlku. Eiginmaður hennar lést fyrir þremur árum og búa þær mæðgur hjá fjölskyldu sinni. Hún vinnur í tískuvöruverslun. 

Inga Lind tók með sér bréf sem Sonia skrifaði henni sem barn og þær náðu strax miklum tilfinningalegum tengslum eins og sjá má í innslaginu hér að neðan.