Rúðuþurrkur fuku af í 50 metrum á sekúndu

Viðbragðsaðilum á Suðurlandi bárust yfir 150 beiðnir um ýmiss konar aðstoð frá því að óveðrið skall yfir umdæmið í gær og þangað til rúmlega þrjú í nótt. Bjarga þurfti ferðamönnum í ógöngum og nokkrir gistu í fjöldahjálparstöðvum í umdæminu.

Versta veðrið er gengið yfir vestan- og sunnanlands en rauð viðvörun er enn í gildi á Norðurlandi eystra. Á Ólafsfirði fjúka þakplötur og brak um bæinn en þar hefur ekki tekist að hindra fok vegna veðurofsa.

Sjá einnig: Veður­vaktin: Af­taka­veður gengur yfir landið

Nú um klukkan hálf sjö eru viðvaranir enn í gildi í nær öllum landshlutum. Appelsínugulu viðvaranirnar á suðvesturhorninu, Suðurlandi, Vesturlandi og á Vestfjörðum falla þó flestar úr gildi nú í morgunsárið og fram eftir morgni. Enn er rauð viðvörun í gildi á Norðurlandi eystra, eins og áður segir, og þá er veður tekið að versna svo um munar á Suðausturlandi.

Ólafsfirðingar veri á varðbergi

Í tilkynningu frá lögreglu á Norðurlandi eystra sem birt var nú á sjöunda tímanum í morgun kemur fram að á Ólafsfirði hafi fokið þakplötur og brak úr tveimur húsum í nótt. Menn frá björgunarsveitinni Tindi hafi fylgst með gangi mála en ekkert geta aðhafst enn. Fólk er varað sérstaklega við fokinu og hvatt til að fara varlega í bænum.

„[…] en vegna veðurofsa hefur ekki verið hægt að koma við neinum aðgerðum til að fergja húsin eða hindra fok frá þeim. Þessi hús eru við Pálsbergsgötu og hús Norlandia. Brak frá þessum byggingum hefur fokið inn á Aðalgötu, Strandgötu, Kirkjuveg, Vesturgötu og fleiri götur undan veðrinu. Björgunarsveitarmenn vilja vara sérstaklega við þessu og hvetja fólk til að vera mjög á varðbergi gagnvart þessu og alls ekki á ferðinni þar sem brak úr húsunum getur farið um.“

Tré rifnuðu upp með rótum

Þá hafa viðbragðsaðilar á Suðurlandi sinnt fjölmörgum útköllum vegna óveðursins í gær og í nótt. Í tilkynningu frá lögreglu á Suðurlandi segir að búast megi við því að ekki verði opnað aftur fyrir umferð um Hellisheiði, Þrengsli, Lyngdalsheiði, Þingvallaveg og Biskupstungnabraut fyrr en líða tekur að hádegi. Fylgjast má með fréttum af vegalokunum á vef Vegagerðarinnar.

Klukkan korter yfir þrjú í nótt höfðu borist yfir 150 beiðnir um ýmiss konar aðstoð á Suðurlandi. Þar má nefna að á Selfossi brotnuðu eða rifnuðu upp með rótum átta tré, hjólhýsi fauk á hliðina og lenti utan í húsi, þakplötur og þakkantar á tólf húsum losnuðu eða fuku af.

Þá bárust tvær beiðnir vegna gróðurhúsa sem voru að fjúka og í þremur tilvikum þurfti að aðstoða ferðamenn sem höfðu lent í því að drepist hafði á bílum þeirra.

Ferðamennirnir voru orðnir mjög kaldir og hraktir, að því er segir í tilkynningu. Í uppsveitum Árnessýslu var jafnframt svo blint að ekki sást fram fyrir vélarhlífar á bílum. Í Ragnárvallasýslu og undir Eyjafjöllum voru nokkrir ferðamenn einnig aðstoðaðir við að komast til byggða.

Tólf gista í Grímsnesi

Þá voru tvær fjöldahjálparstöðvar Rauða kross Íslands opnaðar, önnur á Selfossi og hin á Borg í Grímsnesi. Fjöldahjálparstöðinni á Selfossi var lokað nokkru fyrir miðnætti þar sem þeir fimm einstaklingar sem þangað komu fengu gistingu á nálægu gistiheimili.  Í Grímsnesi gista hins vegar tólf ferðamenn og bíða þess að veðrið gangi niður.

Undir Ingólfsfjalli fóru svo vindhviður upp í 50 m/s og áttu ökumenn sem áttu leið um Suðurlandsveg á þeim kafla í nokkrum vandræðum. Tveir bílar fuku út af veginum en engin slys urðu á fólki. Í tilkynningu segir að vindhviðurnar hafi verið svo hressilegar að báðar rúðuþurrkur á bíl sem átti leið hjá Ingólfsfjalli fuku af.

Á fjórða tímanum í nótt voru flestir viðbragðsaðilar komnir í hús. Aðgerðastjórn var þá einnig í þann mund að draga sig til hlés en verður virkjuð aftur ef þörf krefur. Alls hafa um 160 einstaklingar á rúmlega fjörutíu björgunartækjum tekið þátt í viðbragðsaðgerðum á Suðurlandi vegna ofsaveðursins.