Rafmagn skammtað á Króknum

Rafmagnslaust er nú víða um land vegna ofsaveðursins sem gengið hefur yfir síðasta eina og hálfa sólarhringinn eða svo.

Á Sauðárkróki hefur verið rafmagnslaust í meira en sólarhring en RARIK hefur sett upp skömmtunaráætlun rafmagns fyrir bæinn.

Lögreglan á Norðurlandi vestra birti meðfylgjandi mynd af skömmtunaráætluninni á Facebook-síðu sinni fyrir stundu og minnti bæjarbúa í leiðinni á að fara sparlega með rafmagn, til dæmis jólaljós og annað sem má bíða betri tíma.

 

Þá er fólk hvatt til að halda sig heima enn um sinn.