Frost allt niður í 12 stig á Suðurlandi

Það verður norðlæg átt á landinu í dag, víða 8 til 15 metrar á sekúndu um landið norðanvert, að því er segir í hugleiðingum veðurfræðings á vef Veðurstofu Íslands.

Á Austurlandi verður hvöss vestanátt fram yfir hádegi og gæti vindur farið upp í 20 metra á sekúndu í strengjum við fjöll. Vindur verður heldur hægari suðvestan til á landinu.

Með norðanáttinni fylgir éljagangur um landið norðanvert og er veður kólnandi. Á Suðurlandi má búast við því að það verði léttskýjað en ansi kalt með frosti allt niður í 12 stig.

Á morgun, föstudag, er svo útlit fyrir fallegt vetrarveður víðast hvar, léttskýjað og frost. Næsta lægð er síðan væntanleg að suðurströndinni seinni partinn á laugardaginn með örlítið hlýrra lofti og snjókomu eða slyddu.

Veðurhorfur á landinu:

Norðlæg átt 8-15 m/s og él, en vestan 15-20 austan til fram yfir hádegi. Lengst af hæg norðlæg átt og léttskýjað sunnan- og vestantil. Frost 0 til 12 stig, kaldast í uppsveitum sunnanlands.

Norðlæg eða breytileg átt, 3-10 m/s, á morgun, en norðvestan 10-15 austast. Éljagangur norðaustan- og austanlands en annars bjartviðri. Frost 1 til 9 stig, kaldast norðan til.

Á föstudag:

Norðan 3-10 m/s, en 10-15 með norðausturströndinni. Dálítil snjókoma eða él norðan- og austanlands, annars léttskýjað. Frost 2 til 10 stig, kaldast inn til landsins.

Á laugardag:

Vaxandi austlæg átt, 10-15 m/s síðdegis en hægari norðaustanlands. Að mestu skýjað og þurrt, en dálítil él með norðurströndinni og snjókoma sunnan til um kvöldið. Minnkandi frost.

Á sunnudag:

Norðaustanátt og snjókoma eða slydda með köflum, en úrkomulítið vestanlands. Hiti kringum frostmark.

Á mánudag:

Suðaustanátt, rigning og hiti 1 til 6 stig, en úrkomulítið norðaustan til og frost 1 til 6 stig.