Ræddu stöðuna hjá sáttasemjara

Samninganefndir Blaðamannafélagsins og Samtaka atvinnulífsins funduðu í eina og hálfa klukkustund í gær, degi eftir að blaðamenn kolfelldu nýundirritaðan kjarasamning.

Samkvæmt heimildum var fundurinn ágætur en engin lausn á kjaradeilunni þó í sjónmáli. Ríkissáttasemjari hefur boðað samninganefndirnar aftur til fundar klukkan 11.00 í dag.

Að óbreyttu hefst vinnustöðvun ljósmyndara, tökumanna og þeirra félagsmanna BÍ sem starfa á vefmiðlum Árvakurs, Sýnar, Torgs og RÚV klukkan tíu í fyrramálið og stendur til 22.00 annað kvöld.