Toppliðið með þægilegan sigur í Borgarnesi

Valur átti ekki í miklum vandræðum með Skallagrím þegar liðin áttust við í Dominos-deild kvenna í körfubolta í Borgarnesi í kvöld.

Valskonur lögðu grunninn að sigrinum strax í byrjun en þær leiddu með fimmtán stigum eftir fyrsta leikhluta.

Fór að lokum svo að Valur vann virkilega öruggan 22 stiga sigur, 82-60.

Helena Sverrisdóttir og Kiana Johnson gerðu 20 stig hvor fyrir Valskonur en Helena tók jafnframt 14 fráköst á meðan Kiana gaf 11 stoðsendingar. Í liði Borgnesinga var Kiera Robinson öflug með 29 stig auk þess að taka níu fráköst.

Valur með tveggja stiga forystu á toppi deildarinnar.