„Maður er búinn að sækja um fullt af vinnum en fær ekkert“

Hátt í fimmtíu starfsmönnum fiskvinnslunnar Ísfisks á Akranesi hefur verið sagt upp eins og kom fram á Vísi í gær. Bæjaryfirvöld hafa leitað á náðir Byggðastofnunar og reyna nú að tryggja fjármögnun til þess að halda megi starfseminni gangandi.  Það er mjög þungt hljóð í bæjarbúum og atvinnuhorfur þar ekki góðar.

„Í gær var öllu starfsfólki sagt upp frá og með deginum í gær, þá höfum við ákveðinn tíma til þess að vinna að þessu máli og ætlum okkur að klára það á þessum tíma og draga uppsagnir til baka, gangi eftir að fjármagna “ sagði Albert Svavarsson framkvæmdastjóri Ísfisks í samtali við fréttastofu í dag. Hann segir að flutningarnir á Akranes fyrir tveimur árum hafi verið dýrir, þeir hafi þó alls ekki verið mistök.

„Maður getur lent í áföllum og þá þarf maður bara að vinna úr því.“

Gríðarlegt áfall

Eigi fyrirtækið að lifa þarf að endurfjármagna um 150 milljón króna bankaskuld sem fallin er á gjalddaga. Þar sem lánalína frá bankanum er ekki í boði hafa fyrirtækið og bæjaryfirvöld óskað eftir fyrirgreiðslu frá Byggðarstofnun. Málið verður tekið fyrir á fundi eftir tvær vikur. Fyrirtækið sóttist einnig eftir fyrirgreiðslu frá Byggðastofnun fyrr á árinu en þá var því hafnað.

Sævar Freyr Þráinsson bæjarstjóri Akraneskaupstaðar segir að það yrði gríðarlegt áfall ef Byggðastofnun felist ekki á þetta.

„Í ástandi eins og er nú, þar sem verið er að kólna í hagkerfinu, þá skiptir hvert einasta starf gríðarlega miklu máli. Við erum þarna með einstaklinga, að lang mestu leiti konur, sem að eru að ganga í gegnum það í annað skipti á tveimur árum að fá þessar sáru fréttir.“

Óttast aðra eins tölu á næsta ári

Ein þessara kvenna er Oddný Garðarsdóttir, starfsmaður Ísfisks. Hún segir að það sé „bara ömurlegt“ að vera komin aftur í þessa stöðu. Hún segir að lítið annað sé í boði.

„Maður er búinn að sækja um fullt af vinnum en fær ekkert.“

Starfsfólki grunaði hvað í stefndi enda hafði það ekki verið boðað aftur til vinnu eftir sumarfrí, þar sem fyrirtækið hefur ekki viljað hefja vinnslu fyrr en fjármögnun er tryggð. Bæjarstjóri segir brýnt að fyrirtækið haldist á floti enda vofa fleiri uppsagnir yfir bænum á Grundartangasvæðinu.

„Hér erum við að tala um 50 störf sem hafa farið á liðnu ári og ég geri ráð fyrir að það muni halda áfram. Ég óttast að það sé önnur eins tala framundan á næsta ári,“ segir Sævar Freyr.

Mikil varnarbarátta

„Þetta er grafalvarleg staða,“ segir Vilhjálmur Birgisson formaður Verkalýðsfélags Akraness. „Það er alltaf alvarlegt þegar 60 manns missa vinnuna á einum vettvangi. Þetta væri í raun ígildi þess að 1400 manns myndu missa vinnuna á höfuðborgarsvæðinu í einni svipan. Þannig að þetta er gríðarlegt högg.“ Hann segir að eins og staðan er í dag sé alveg ljóst að það sé engin önnur störf að fá fyrir þetta fólk.

„Þess vegna leggjum við gríðarlega mikla áherslu á það að þetta leysist og fyrirtækið nái að endurfjármagna sig og Byggðastofnun veiti þessu fyrirtæki lánveitingu. Við erum bara að bíða og vona það besta.“

Vilhjálmur segir að hart sé sótt að atvinnumálum á Akranesi og verja þurfi hvert einasta starf í sveitarfélaginu með kjafti og klóm. Mikil varnarbarátta sé í gangi þessa dagana.

„Það munum við gera og stéttarfélagið hefur verið að velta því fyrir sér hvort að það sé að orðið tímabært að boða hér til íbúafundar þar sem að við köllum eftir aðgerðum, til dæmis þingmanna í kjördæminu. Ástandið núna er alvarlegt.“