Hörður Björgvin dettur úr landsliðshópnum vegna meiðsla

Hörður Björgvin Magnússon mun ekki spila með íslenska landsliðinu í komandi leikjum við Frakkland og Andorra í undankeppni EM 2020.

KSÍ greindi frá því rétt í þessu að Hörður Björgvin hefði neyðst til þess að draga sig úr hópnum.

Ástæða þess eru ökklameiðsli sem hann varð fyrir á fimmtudag. Hörður spilaði ekki með félagsliði sínu, CSKA Moskvu, vegna meiðslanna í dag.

Ekki er vitað hversu lengi Hörður verður frá keppni.

Í tilkynningu KSÍ er ekki greint frá því hvort annar leikmaður verði kallaður inn í staðinn. Hörður er annar leikmaðurinn til þess að detta út úr hópnum vegna meiðsla, en landsliðsfyrirliðinn Aron Einar Gunnarsson getur heldur ekki verið með.

Hörður Björgvin Magnússon hefur neyðst til að draga sig út úr leikmannahópi Íslands fyrir komandi leiki vegna ökklameiðsla sem hann varð fyrir á fimmtudag. Ekki er vitað hversu lengi Hörður verður frá. #fyririslandpic.twitter.com/L3KjTyxgwN

— Knattspyrnusambandið (@footballiceland) October 6, 2019