Una sækist eftir embætti ritara VG

Una Hildardóttir, varaþingmaður Vinstri grænna í Suðvestukjördæmi og formaður Landssamtaka ungmennafélaga, sækist eftir embætti ritara flokksins. Stjórnarkjör fer fram á Landsfundi Vinstri grænna þriðju helgina í október. Una hefur gegnt embætti gjaldkera VG í fjögur ár en sækist nú eftir öðru hlutverki innan forystu flokksins en hún hefur tekið virkan þátt í starfi VG frá árinu 2011. 

„Ég vil halda áfram að leggja mitt að mörkum og vinna fyrir hreyfinguna á vettvangi stjórnar. Ég hlakka til að takast á við nýjar áskoranir í nýju embætti,“ skrifar Una í framboðsyfirlýsingu sem birtist á vef VG í dag.

Elín Oddný Sigurðardóttir, varaborgarfulltrúi Vinstri grænna, er ritari flokksins í dag en hún lýsti því yfir á flokksráðsfundi í haust að hún hyggist ekki sækjast eftir endurkjöri. Í samtali við Vísi segist Elín Oddný telja eðlilegt að regluleg endurnýjun sé í forystu flokksins og eftir fjögur ár í embætti ritara hyggist hún einbeita sér áfram að því að sinna þeim störfum sem hún er kjörin til að gegna fyrir hönd Vinstri grænna.

Í gær lýsti Guðmundur Ingi Guðbrandsson umhverfisráðherra því yfir að hann sækist eftir embætti varaformanns flokksins en sitjandi varaformaður hyggst ekki sækjast eftir endurkjöri.