Ríkjandi meisturum spáð titlinum á ný

KR og Val er spáð sigri í Domino's deildum karla og kvenna í vor, en deildirnar fara báðar af stað í þessari viku.

Árleg spá formanna, þjálfara og fyrirliða félaganna var birt í dag og munu KR-ingar verja Íslandsmeistaratitilinn gangi spáin eftir.

„Umræðan er búin að vera svona og það er fullt af góðum liðum, en mönnum lýst best á okkur,“ sagði Ingi Þór Steindórsson þegar spáin var kunngjörð í dag.

„Við erum ánægðir með okkur en vitum að við þurfum að leggja inn mikla vinnu til að verðskulda að vera númer eitt.“

Ríkjandi Íslandsmeisturum er einnig spáð titlinum í kvennaflokki.

„Lið sem að nær árangri eins og við náðum í fyrra á von á því að þeim sé náð góðu gengi aftur,“ sagði Darri Freyr Atlason, þjálfari Vals.