Bregst við gagnrýni Blaðamannafélagsins með endurskoðun fjölmiðlalaga

Lilja Alfreðsdóttir, mennta- og menningarmálaráðherra, ætlar að ráðast í endurskoðun fjölmiðlalaga meðal annars til að bregðast við gagnrýni sem leiddi til þess að stjórn Blaðamannafélags Íslands samþykkti að draga fulltrúa sinn úr fjölmiðlanefnd. Þetta kom fram í máli Lilju í svari hennar við fyrirspurn Kolbeins Óttarssonar Proppé, þingmanns Vinstri grænna, í óundirbúnum fyrirspurnatíma á Alþingi í dag.

Fyrirspurn hans laut meðal annars að gagnrýni Blaðamannafélagsins frá því fyrr á árinu og varðaði úrskurði fjölmiðlanefndar og álit nefndarinnar er varða umfjallanir fjölmiðla vegna kvartana sem borist höfðu nefndinni á grundvelli 26. greinar fjölmiðlalaga. Sú grein laganna kveður meðal annars á um að fjölmiðlar skuli „halda í heiðri lýðræðislegar grundvallarreglur og standa vörð um tjáningarfrelsi.“

Sjá einnig: Draga fulltrúa sinn úr starfi fjölmiðlanefndar

„Þetta var býsna beinskeytt gagnrýni sem endaði nú á því að Blaðamannafélagið dró fulltrúa sinn út úr fjölmiðlanefnd,“ sagði Kolbeinn á Alþingi í dag. Í yfirlýsingu frá Blaðamannafélaginu á sínum tíma var til að mynda vísað til tveggja nýlegra álita nefndarinnar sem snúist hafi gagngert um vinnubrögð og fréttamat blaðamanna í einstökum málum.

 

„Mig langar að spyrja hæstvirtan ráðherra ljósi þessarar alvarlegu gagnrýni hvort að ráðherra telji ástæðu til þess að endurskoða lög um fjölmiðla og þá sérstaklega með það að leiðarljósi að skýra hlutverk fjölmiðlanefndar?“ spurði Kolbeinn.

Lilja Alfreðsdóttir mennta- og menningarmálaráðherra svaraði á þá leið að hún teldi vissulega vera tilefni til þess. „Er varðar fyrirspurn háttvirts þingmanns þá hef ég, já, í hyggju að endurskoða fjölmiðlalögin meðal annars vegna þessara ábendinga,“ sagði Lilja.

„Að mínu viti er það mjög bagalegt að Blaðamannafélag Íslands og fjölmiðlanefnd hafi staðið í þessum deilum og segja má að það hafi dregið svolítið til tíðinda vegna þessa. Við þurfum að skýra, þurfum að hafa sama skilning og sömu nálgun á 26. greinina þannig að ég svara því játandi. Ég hef í hyggju að endurskoða þessi lög.“

Það sé meðal annars vegna þeirra hröðu breytinga sem séu að eiga sér stað á fjölmiðlamarkaði, meðal annars vegna tæknibreytinga. „Við þurfum að vera á tánum,“ sagði Lilja. 

Líkt og fjallað hefur verið um hyggst ráðherra einnig leggja fram frumvarp á næstunni sem meðal annars kveður á um beina ríkisstyrki til einkarekinna fjölmiðla en afar skiptar skoðanir eru uppi um þau áform, ekki síður meðal þingmanna stjórnarflokkanna.