Fyrsti bókmenntatextinn í borgarlandslagið

Falleg athöfn átti sér stað á nýju torgi við gömlu steinbryggjuna á horni Pósthússtrætis og Tryggvagötu í gær. Þá afhjúpaði Dagur B. Eggertsson borgarstjóri ljóðlínur eftir Vilborgu Dagbjartsdóttur skáld, letraðar í stein, að henni viðstaddri og mörgum fleirum. Línurnar eru úr ljóðinu Vetur.

Þegar slokknaði á morgunstjörnunni

varð máninn kyrr.

Sólin veifaði

skýjaslæðu

til hans

yfir fjallið

sem gleymdi að taka ofan

nátthúfuna

Dagur mælti falleg orð til Vilborgar og gat þess að hann væri afar ánægður með að fyrsti bókmenntatextinn sem greyptur væri í borgarlandslagið væri eftir hana, enda næði hún að fanga náttúru borgarinnar á einstakan hátt. Giskaði líka á að margir gamlir nemendur hennar úr Austurbæjarskóla ættu eftir að gera sér ferð á torgið. Skáldin Sunna Dís Másdóttir og Gerður Kristný lýstu upp stundina með ljóðalestri.

Á Steinbryggju geta vegfarendur sest á skáldabekk, skannað rafrænan kóða með snjallsíma og hlustað á Vilborgu sjálfa fara með ljóðið Vetur.