Kolbeinn: Vildi gefa eitthvað til baka

Kolbeinn Sigþórsson þakkaði Erik Hamren traustið síðustu mánuði með því að skora fyrsta mark Íslands gegn Moldóvu í undankeppni EM 2020 á Laugardalsvelli í dag.

Kolbeinn var í byrjunarliðinu ásamt Jóni Daða Böðvarssyni en þetta var í fyrsta skipti síðan á EM í Frakklandi 2016 sem þeir byrja báðir leik fyrir íslenska landsliðið.

„Þetta er frábær tilfinning. Geggjað að ná að skora og gefur mér mikið,“ sagði Kolbeinn við Henry Birgi Gunnarsson að leik loknum.

Ísland vann 3-0 sigur í leiknum og fór á topp riðilsins, en Frakkland og Tyrkland spila sína leiki í kvöld.



„Við byrjuðum ekki sérlega vel en þetta fór að rúlla eftir 20 mínútur. Við fórum að vinna fleiri seinni bolta sem gaf hættulegri sóknir.“

„Mark í fyrri hálfleik róaði mannskapinn, það er mikilvægt að ná fyrsta markinu.“

Þegar Kolbeinn gekk af velli í dag stóðu áhorfendur á Laugardalsvelli upp fyrir honum, enda er framherjinn enn í miklum metum hjá stuðningsmönnum liðsins.

„Það er ekki slæmt að fá góðan stuðning og ég get vonandi haldið áfram að gefa til baka,“ sagði Kolbeinn.

„Ég vildi gefa eitthvað til baka eftir að hafa verið valinn í liðið fyrir ári þegar ég gat ekki spilað, það hjálpaði mér mjög mikið.“

„Ég er að komast í betra stand, völlurinn var þungur í dag en ég er á fínum stað.“

Það er stutt í næsta leik, Ísland mætir Albaníu ytra á þriðjudag. Er Kolbeinn tilbúinn í aðrar 60 mínútur þar? „Já, ég held það. Tek næstu tvo daga í að ná mér en svo verð ég klár aftur.“