Ný hljómplata Taylor Swift persónuleg og tileinkuð ástinni

Bandaríska söngkonan Taylor Swift gaf í dag út hljómplötuna Lover en samhliða útgáfunni frumsýndi hún myndband við titillag plötunnar.

Sagan sem sögð er í myndbandinu gerist innan í snjókúlu sem stúlka ein fær að gjöf á jóladag. Í myndbandinu er ástarsamband og tilhugalífið í forgrunni. Atvinnudansarinn Christian Owens leikur ástarviðfang Taylors en „parið“ sést ganga í gengum hæðir og lægðir nútíma ástarsambands.

Þema myndbandsins rímar vel við orsendingu Taylors á Twitter. Í tilkynningu um útgáfu plötunnar sagði hún að Lover væri eins konar ástarhátíð. Þar fagnaði hún ástinni í allri sinni dýrð; notalegheitunum og ringulreiðinni.

This album is very much a celebration of love, in all its complexity, coziness, and chaos. It's the first album of mine that I've ever owned, and I couldn't be more proud. I'm so excited that #Lover is out NOW: https://t.co/t7jK7XmEqa pic.twitter.com/NMgE7LTdGZ

— Taylor Swift (@taylorswift13) August 23, 2019

Platan Lover er númer sjö í röðinni en á henni má finna átján lög sem öll hverfast um ástina með einum eða öðrum hætti. Taylor segir að textarnir á plötunni séu afar persónulegir en hún semur um tilfinningar og persónur í eigin lífi. Þannig fjalla nokkrir textarnir um Joe Alwyn, kærasta hennar til þriggja ára.

Lagið Soon You‘ll Get Better, er kannski persónulegasta lagið á plötunni en það fjallar um alvarleg veikindi móður hennar sem glímir við krabbamein.

„Það reyndist mér, afar, afar erfitt að skrifa textann. Fjölskyldan þurfti að taka ákvörðun um það hvort ég ætti yfir höfuð að leyfa laginu að fljóta með á plötunni,“ sagði söngkonan.

Það er mikið um að vera hjá Taylor þessa dagana en á mánudaginn mun hún spila á MTV verðlaunahátíðinni. Taylor og Ariana Grande eru með flestar tilnefningarnar í ár.

Taylor flutti nokkur ný og gömul lög í morgunþættinum Good Morning America.