Miley losar sig við eftir­nafnið

Nafnabreytinguna má sjá á bæði Instagram-síðu tónlistarkonunnar og á vefsíðu hennar. Notendanafn hennar á Instagram er núna einfaldlega @miley í stað @mileycyrus meðan vefsíðan hennar er komin með slóðina mileyofficial.com þegar hún var áður mileycyrus.com.

Söngkonan birti einnig tvær nýjar myndir af sér með rauðum bakgrunni á Instagram og við aðra þeirra skrifaði hún einfaldlega „MILEY.“. Miðað við útfærsluna og umstangið virðist hún vera að gefa nýrri útgáfu undir fótinn. Hún hefur áður sagt að hún sé að vinna að sinni tíundu plötu sem verði tileinkuð ástarlögum.

Destiny Hope í Miley Ray Cyrus í Miley

Nafnabreytingin er forvitnileg fyrir þær sakir að hún er þar markvisst að fjarlægjast eftirnafnið Cyrus sem hún fær auðvitað frá föður sínum, kántrístjörnunni Billy Ray Cyrus, en þau hafa átt stormasamt samband í gegnum tíðina.

Þetta er þó ekki fyrsta nafnabreyting söngkonunnar, hún var skírð Destiny Hope Cyrus en breytti nafni sínu formlega í Miley Ray Cyrus árið 2008. Nafnið Miley er dregið af viðurnefninu Smiley sem foreldrar hennar gáfu henni í æsku og styttu síðar í Miley.

Níunda plata Mileyar, Something Beautiful, kom út í maí á síðasta ári auk smáskífanna „End of the World“, „Easy Lover“ og „Secrets“ sem voru á henni. Fyrr á þessu ári gaf hún svo út lagið „Younger You“ sem hluta af tuttugu ára afmælisþætti Hönnuh Montana.

Nafnabreytingin kemur jafnframt á erfiðum tíma í lífi söngkonunnar því guðmóðir hennar, Dolly Parton, lést 25. ágúst síðastliðinn, 80 ára að aldri, og var borin til grafar þremur dögum síðar í lítilli athöfn. Parton var náin vinkona föður Mileyar og var þess vegna valin sem guðmóðir hennar og áttu þær gott samband gegnum árin.

Miley heiðraði Parton á samfélagsmiðlum sínum, sagði ólýsanlegt að missa „Dolly frænku“ og bætti við að þeirra helgustu augnablik yrðu áfram prívat.

„Það sem ég veit er að Dolly myndi vilja að ég myndi finna fyrir því, skrifa lag um það, og halda síðan áfram með lífið og vera sterk. Ég er með engil mér við hlið og hef alltaf gert. Eitt af okkar síðustu samtölum var um tónlist og umbreytingar,“ sagði Miley í Instagram-færslu.