Íslensk fjárfesting hagnaðist um 45 milljónir króna

Hagnaður fjárfestingarfélagsins Íslenskrar fjárfestingar nam 45 milljónum króna á síðasta ári samanborið við 510 milljónir árið 2017 og 1.062 milljónir árið þar á undan. Hagnaður samstæðunnar fyrir fjármagnsliði og afskriftir (EBITDA) var 972 milljónir króna og dróst saman um 6,5 prósent milli ára.

Í ársskýrslu fjárfestingarfélagsins segir að árið 2018 hafi verið undir væntingum. „Helstu skýringar þess eru að á árinu 2018 var rekstur stærstu félaganna undir væntingum auk þess sem nokkur frumkvöðlaverkefni og þróunarverkefni eru enn að sanna sig og skila því tapi í samstæðunni,“ segir í skýrslunni.

„Þó teljum við að mikill óinnleystur hagnaður sé væntanlegur á næstu árum vegna fasteignaverkefna sem eru í söluferli eða munu verða seld á næstu árum auk þess sem nokkur frumkvöðlaverkefni eru komin í grænar tölur á árinu 2019.“

Á meðal eigna félagsins eru evrópska ferðaþjónustufyrirtækið Kilroy, hótelfélagið RR hótel sem rekur hótel í miðbæ Reykjavíkur og Öldungur sem rekur hjúkrunarheimilið Sóltún. Þá er Íslensk fjárfesting stórtækt í fasteignaþróun í Reykjavík. Félagið er meðal annars í stórum verkefnum við Austurbakka og á Kársnesi.

Íslensk fjárfesting er í jafnri eigu Arnars Þórissonar og Þóris Kjartanssonar en félagið var stofnað árið 1999 í þeim tilgangi að halda utan um ýmsar fjárfestingar eigendanna. Eignir þess nema um 19 milljörðum króna og eigið féð tæplega 3,8 milljörðum.