Útlit fyrir þurrk næstu tíu daga

Háþrýstisvæði verður hér ríkjandi fram yfir helgi og jafnvel lengur. Norðaustanátt er spáð í framhaldinu og hún af fremur þurru tagi. Þetta segir Einar Sveinbjörnsson veðurfræðingur á vefnum Blika.is en þar fjallar hann um tvö kort úr tveimur ólíkum reiknilíkönunum sem bæði gefa til kynna að þurrt verði til 10. ágúst í það heila tekið á landinu.

Bandaríska reiknilíkanið gerir ráð fyrir uppsafnaðri úrkomu um eða innan við 5 millimetra þessa tíu daga í spánni. Ef spáin gengur eftir fellur vart dropi á Vestfjörðum og en verulega uppsafnaða úrkomu er hins vegar að sjá austur yfir Atlantshaf á breiðu belti suður undan og inn yfir Bretlandseyjar og meginland Evrópu. Eins nánast alveg þurrt á Grænlandi og væntanlega sólríkt einnig, skrifar Einar.

Evrópska líkanið gerir ráð fyrir 0 til 25 prósentum af meðalúrkomu hér við land en þó stutt í vætu suður af landinu.

„Þessi spá er afar eindregin hvernig sem á það er litið! Til samanburðar er rétt að hafa í huga að 10 daga úrkoma á þessum tíma er að jafnaði um 10 mm þar sem þurrast er upp í 30 mm suðaustanlands,“ skrifar Einar á vef sinn Blika.is.