Inter að gefast upp á viðræðum við Man Utd?

Erfiðlega gengur að fá niðurstöðu í samningaviðræður ítalska úrvalsdeildarliðsins Inter Milan og enska úrvalsdeildarliðsins Manchester United vegna belgíska framherjans Romelu Lukaku.

Nokkuð ljóst þykir að Belginn eigi ekki framtíð á Old Trafford en Man Utd er ekki tilbúið að selja þennan 26 ára gamla markahrók fyrir neina smámuni og samkvæmt fréttum frá Ítalíu eru forráðamenn Inter farnir að skoða aðra kosti á leikmannamarkaðnum.

„Við erum búnir að gera þeim gott tilboð. Tilboð sem er í takt við markaðsvirði leikmannsins en samt tekst okkur ekki að ná saman við þá,“ segir Beppe Marotta, stjórnarformaður ítalska félagsins.

„Við höldum áfram að skoða stöðuna og það getur allt gerst á markaðnum,“ sagði Marotta ennfremur.

Inter gæti snúið spjótum sínum að franska stórveldinu PSG með það fyrir augum að kaupa hinn 32 ára gamla Edinson Cavani en hann á aðeins eitt ár eftir af samningi sínum við frönsku meistarana.

Cavani þekkir vel til á Ítalíu þar sem hann sló fyrst í gegn með Palermo og Napoli en samkvæmt ítölskum fjölmiðlum hefur hann verið í samskiptum við landa sína hjá Inter, Diego Godín og Matias Vecino, vegna mögulegrar endurkomu til Ítalíu.

Lukaku gæti engu að síður endað á Ítalíu þar sem orðrómar um áhuga ítölsku meistaranna Juventus verða sífellt háværari.