Loka aðkomu að Sauðleysuvatni vegna slæms ástands vegar

Lokað hefur verið fyrir aðkomu að Sauðleysuvatni innan Friðlands að Fjallabaki á grundvelli náttúruverndarlaga. Umhverfisstofnun tók þessa ákvörðun þann 28. júní síðastliðinn vegna slæms ástands vegarins sem hefur grafist niður í leysingum. Ekið hefur verið utan hans með tilheyrandi raski.

Í framhaldi af þeirri lokun hefur Umhverfisstofnun ákveðið á grundvelli vegalaga að banna umferð vélknúinna ökutækja um veginn um óákveðinn tíma þar til hægt verður að koma í veg fyrir frekari skemmdir. Stofnunin mun endurmeta ráðstafanir á svæðinu eigi síðar en 1. október.