Útiloka ekki rigningu á skraufþurrum svæðum

Fárra breytingar er að vænta í veðrinu að sögn veðurfræðings, sem segir að veður dagsins muni svipa til þess sem heilsaði upp á landsmenn í gær.

Á Norður- og Austurlandi eru horfur á þungbúnu veðri og dálítilli rigningu eða súld. Sunnan- og vestanlands verður skýjað með köflum og ekki er loku fyrir það skotið að stöku skúrir láti á sér kræla síðdegis. Ætla má að bændur og búalið fagni þessu, enda hefur lítið rignt á þessu svæði síðustu vikur. Er nú svo komið að óvissustig Almannavarna vegna hættu á gróðureldum er í gildi á Vesturlandi. 

Eitthvað gæti þó sést til sólar milli skýjanna. Með þessu verður svo boðið upp á hæga norðanátt.

Hitinn verður frá 5 stigum með norðurströndinni upp í 15 stig á Suðurlandi þegar best lætur.

„Það er skemmst frá því að segja að spáin fyrir morgundaginn er nánast sú sama og fyrir daginn í dag,“ segir veðurfræðingur.

„Ef við kíkjum á spána fyrir helgina, þá er það helst að frétta að það lítur út fyrir að það létti til og hlýni norðan og austanlands. Yfirleitt verður þurrt á landinu og hlýrri loftmassi færist smám saman yfir, sem þýðir að hámarkshiti dagsins verður hærri en í þeirri tiltölulega svölu norðanátt sem ríkir á landinu í dag,“ segir hann ennfremur.

Veðurhorfur á landinu næstu daga

Á föstudag (sumarsólstöður):

Norðvestan 3-8 m/s. Dálítil rigning á Norður- og Austurlandi. Skýjað með köflum sunnan- og vestanlands og stöku skúrir, einkum síðdegis. Hiti 5 til 15 stig, hlýjast á Suðurlandi.

Á laugardag:

Vestlæg átt 3-8 m/s og bjart með köflum. Hiti 10 til 16 stig. Norðlægari og svolítil rigning norðaustantil á landinu framan af degi og svalt í veðri, en léttir til þar seinnipartinn.

Á sunnudag:

Suðvestan 3-8. Skýjað með köflum vestanlands, en víða bjart í öðrum landshlutum. Hiti 12 til 18 stig.

Á mánudag, þriðjudag og miðvikudag:

Vestlæg átt, víða léttskýjað og hlýtt í veðri. Skýjað að mestu með vesturströndinni og svalara.