Bjó til lag úr aðsendum hljóðbrotum

Lagahöfundurinn Ingi Bauer, sem margir þekkja fyrir lög sín á borð við Upp til Hópa, með Herra Hnetusmjör og Dicks með Séra Bjössa, bjó á dögunum til óvenjulegt lag.

Tónsmíðin var hluti af starfsemi YouTube rásarinnar Ice Cold sem hann heldur úti ásamt Stefáni Atla Rúnarssyni og þar gera þeir ýmislegt, þar á meðal streyma þeir beinum útsendingum af Fortnite og fá reglulega góða gesti.

Lagið, sem Ingi hafði einungis hálftíma til að semja frá grunni, var gert úr ýmsum hljóðum sem fylgjendur Ice Cold á Instagram höfðu sent á þá félaga.

Eins og áður segir hefur Ingi samið nokkur af vinsælustu lögum síðasta árs en nýja lagið má sjá í myndbandinu neðst í fréttinni.