Leonard í hóp með Abdul-Jabbar og James

Kawhi Leonard, leikmaður nýkrýndra NBA-meistara Toronto Raptors, var valinn besti leikmaður (MVP) úrslitaeinvígisins sem lauk í gær. Toronto vann þá Golden State Warriors, 110-114, á útivelli og tryggði sér titilinn.

Þetta er í annað sinn sem Leonard fær þessa viðurkenningu en hann var valinn besti leikmaður úrslitanna þegar San Antonio Spurs varð meistari 2014.

Leonard komst þar með í ansi góðan hóp með Kareem Abdul-Jabbar og LeBron James. Þeir eru þeir einu í sögu NBA sem hafa verið valdir bestu leikmenn úrslita með tveimur liðum.

Abdul-Jabbar, sem gekk þá enn undir nafninu Lew Alcindor, var valinn bestur í úrslitunum þegar Milwaukee Bucks varð meistari 1971. Hann endurtók leikinn með Los Angeles Lakers 1985.

James var valinn bestur í úrslitunum þegar Miami Heat varð meistari 2012 og 2013. Hann var svo valinn bestur í úrslitunum þegar Cleveland Cavaliers varð meistari í fyrsta og eina sinn 2016.

James er einn fjögurra leikmanna sem hafa þrisvar sinnum verið valdir bestir í úrslitum NBA. Hinir eru Magic Johnson, Shaquille O'Neal og Tim Duncan. Michael Jordan á metið en hann var sex sinnum valinn besti leikmaður úrslitanna.