Spennt að fá spila með litlu systur í sal pabba síns: „Léttir fyrir mömmu“

Haukarnir eru að fá sitt fólk aftur heim á Ásvelli og hafa þeir nú endurheimt fyrrum fyrirliða kvennaliðsins.

Auður Íris Ólafsdóttir er á heimleið en Körfuknattleiksdeild Hauka og Auður Íris Ólafsdóttir hafa gert tveggja ára samning.

Auður ólst upp hjá Haukum og var fyrirliði liðsins þegar hún yfirgaf félagið sumarið 2016. Hún hefur síðan spilað með Skallagrími, Breiðabliki og nú síðast Stjörnunni.

Auður segist vera ánægð að vera komin aftur heim í Hauka þó ákvörðunin að yfirgefa Stjörnuna hafi verið erfið. „Mér finnst æðislegt að vera komin heim í Haukana, ákvörðunin var þó erfið þar sem Stjarnan er frábært félag,“ sagði Auður.

Auður var með 5,2 stig, 3,7 fráköst og 1,7 stoðsendingu að meðaltali í 20 leikjum á síðustu leiktíð hjá Stjörnunni. Þá var hún valinn varnarmaður ársins í Domino‘s deild kvenna á lokahófi Körfuknattleikssambandsins.

Auður hittir fyrir systur sína Sigrúnu og er þetta í fyrsta skipti sem þær systur spila saman í efstu deild. Þá er Ólafssalur, sem verður heimavöllur Hauka í Domino‘s deildinni á næstu leiktíð, nefndur í höfuð föður þeirra Ólafi E. Rafnssyni.

„Ég er spennt að fá spila með litlu systur og spila í Ólafssal – svo hugsa ég að þetta sé nú ákveðinn léttir fyrir móður okkar að geta haldið eingöngu með Haukum. Ég hlakka til tímabilsins, stelpurnar í þessu liði eru frábærar og mikill metnaður í félaginu. Það er rosalega gott að vera komin í Haukafjölskylduna aftur.“

Ólöf Helga Pálsdóttir, þjálfari Hauka, sagðist hlakka til að fá Auði til baka og að hún myndi styrkja liðið mikið á báðum endum vallarins. „Við hlökkum til að fá Auði heim og bæta í hópinn af uppöldum Hauka leikmönnum. Hún mun styrkja liðið mikið í vörn, sókn og með reynslu sinni. Það verður líka gaman að sjá systurnar saman aftur.“