Brasilíska landsliðið í knattspyrnu batt endahnútinn á undirbúning sinn fyrir Copa America í kvöld þegar liðið mætti Hondúras í vináttuleik.
Það var snemma ljóst í hvað stefndi því Gabriel Jesus og Thiago Silva komu Brasilíu í 2-0 á fyrsta stundarfjórðungi leiksins. Ekki vænkaðist hagur Hondúrasa þegar Romell Quioto fékk að líta rauða spjaldið fyrir glórulausa tæklingu á Arthur eftir rúmlega hálftíma leik. Þurfti Arthur að yfirgefa völlinn í kjölfarið vegna meiðsla.
11 á móti 10 héldu Brassar áfram að raða inn mörkum og fór að lokum svo að þeir unnu 7-0 sigur þar sem Gabriel Jesus bætti við öðru marki sínu auk þess sem Philippe Coutinho, David Neres, Roberto Firmino og Richarlison voru allir á skotskónum.
Brasilía er gestgjafi á Copa America en þeir hefja leik gegn Bólivíu í Sao Paulo þann 15.júní næstkomandi.
Brassar skoruðu sjö í síðasta vináttuleiknum
