Ragnar hættir sem forstjóri Norðuráls

Ragnar Guðmundsson hefur óskað eftir að láta af störfum sem forstjóri Norðuráls. Gunnar Guðlaugsson hefur verið ráðinn í hans stað.

Í tilkynningu frá Norðuráli segir að Ragnar hafi hafið störf hjá Norðuráli árið 1997 sem framkvæmdastjóri fjármálasviðs og tekið við sem forstjóri árið 2007. Hann muni verða stjórnendum Norðuráls til ráðgjafar næstu mánuði.  

„Gunnar Guðlaugsson hefur verið ráðinn forstjóri Norðuráls. Gunnar hóf störf hjá Norðuráli 2008 og hefur verið framkvæmdastjóri Norðuráls á Grundartanga frá 2009 og framkvæmdastjóri yfir starfsemi Century Aluminum í Evrópu og Asíu. Því hlutverki mun hann sinna áfram,“ segir í tilkynningunni.

Fram kom í Viðskiptablaðinu á dögunum að afkoma Norðuráls á Grundartanga í fyrra hefði verið sú næstversta í áratug. Hagnaður ársins lækkaði úr þremur milljörðum í 500 milljónir króna.

„Súrálsverð hækkaði mjög verulega og samhliða því lækkaði álverð seinni hluta ársins, svo markaðurinn var mjög erfiður. Þetta ár fer ekki vel af stað en við erum byrjuð að sjá merki um að súrálsverð sé farið að lækka. Álverð er ennþá í kringum 1.800 dollara sem er mjög lágt. Það þrengir að þegar hvort tveggja hækkar hráefnisverð og afurðaverðið lækkar,“ sagði Ragnar við VB

„Við teljum álverð í kringum 1.800 dollara tiltölulega lágt. Birgðir á áli fara minnkandi og það er út af fyrir sig jákvætt. Vonandi leiðir það til hærra verðs á næstu misserum.“