Haukur snýr heim úr heimsendingum

Haukur Jarl Kristjánsson snýr aftur til fyrirtækisins The Engine, dótturfyrirtækisins auglýsingastofunnar Pipars/TBWA, sem sér um markaðssetningu á netinu.

Haukur Jarl hefur búið og starfað í Berlín undanfarin fjögur ár, en þar áður starfaði hann fyrir forvera The Engine, fyrirtækinu Nordic eMarketing, á árabilinu 2008 til 2015. Þar vann hann til verðlauna árið 2014 fyrir bestu „PPC-herferðina“ á European Search Awards.

Í tilkynningu þar sem greint er frá vistaskiptum hans segir að í Berlín hafi Haukur í fyrstu starfað hjá Foodpanda, þar sem hann var yfir leitarvélamarkaðssetningu fyrirtækisins. Síðar tók hann við 15 manna markaðsteymi hjá Delivery Hero sem er talið framarlega í heimsendingum á mat.

Delivery Hero starfar í rúmlega 40 löndum, sér um meira en 250 þúsund veitingastaði og afgreiddi rúmlega 369 milljónir pantanir á síðasta ári. Störf hans fyrir Delivery Hero skiluðu honum verðlaunum fyrir árangursríkustu notkun tækni í leitarherferð á The Drum Search Awards í apríl.

Spennandi markaður heima

Haft er eftir Hauki í tilkynningunni að það hafi verið mikil áskorun að starfa fyrir slíkt stórfyrirtæki. „Það starfa rúmlega 19.000 manns á heimsvísu hjá Delivery Hero og þar af er markaðsdeildin í höfuðstöðvunum í Berlín um 200 manns. Ég var ábyrgur fyrir miklum fjárhæðum og að þeim væri eytt skynsamlega í leitarvélamarkaðssetningu sem er gríðarlega mikilvæg fyrir fyrirtæki sem ætla sér að ná góðum árangri á netinu,“ segir Haukur Jarl sem stýrði teymi sem sá um daglegan rekstur herferða á margvíslegum tungumálum.

„Seinna var ég svo í forsvari fyrir fjölbreytt teymi sem einbeitti sér alfarið að tækni sem tengist netmarkaðssetningu. Þar bættist við mikil reynsla í bankann sem ég tek með mér hingað. Það er áhugaverður og spennandi markaður hér heima og ég mun koma til með innleiða þessa aðferða- og hugmyndafræði fyrir viðskiptavini The Engine. Hér á landi eru mikil sóknarfæri í þessum geira, ekki síst fyrir fyrirtæki sem ætla sér að ná árangri í markaðssetningu á netinu,“ segir Haukur Jarl.