Sjö mánuðir fyrir brot gegn barni

Karlmaður hefur verið dæmdur í sjö mánaða skilorðsbundið fangelsi fyrir kynferðisbrot gegn barni. Maðurinn var dæmdur fyrir að hafa látið stúlku, sem þá var 14 ára gömul, snerta getnaðarlim hans og fróa sér.

Málið var tekið fyrir í Héraðsdómi Norðurlands eystra en fram kemur í dómnum að maðurinn og stúlkan höfðu þekkst og átt í talsverðum rafrænum samskiptum. Umrædd atvik átti sér stað er maðurinn sótti stúlkuna eftir að hún bað hann um að kaupa sér sígarettur.

Óku þau á afskekktan stað í nágrenni Akureyrar þar sem þau reyktu saman sígarettur. Settust þau síðan í aftursæti bílsins þar sem maðurinn fór að kyssa stúlkuna. Var maðurinn ákærður fyrir að hafa snert brjóst konunnar og látið hana fróa sér.

Maðurinn játaði því að hafa kysst stúlkuna en neitaði því að hann hafi látið hana fróa sér. Var það hins vegar mat dómsins að allt frá því að maðurinn gaf lögregluskýrslu hafi framburður hans um það atriði verið á reiki, en framburður stúlkunnar verið allskýr og trúverðugur um helstu sakaratriði málsins.

Var maðurinn því sakfelldur fyrir kynferðisbrot gegn barni og dæmdur í sjö mánaða fangelsi, skilorðsbundið til tveggja ára.

Í dómi héraðsdóms segir að við ákvörðun refsingar hafi verið horft til þess að mikill dráttur hafi orðið á málinu, en brotið var framið árið 2013 er maðurinn var sautján ára og stúlkan fjórtán ára.

„Til þess ber einnig að líta að ákærði játaði, eins og áður er rakið, nær undanbragðalaust hluta verknaðarlýsingar og sakargiftir samkvæmt ákæru, en lýsti einnig yfir iðran vegna þeirrar háttsemi. Þá er hann ungur að árum og var að auki þegar hann framdi brotið aðeins 17 ára og því barn að lögum. Þá ber að áliti dómara að taka sérstakt tillit til þess að mál þetta hefur dregist mjög í meðförum á öllum stigum, sem ákærða verður á engan hátt kennt um.“