Lýsandi danska ríkissjónvarpsins segir Hatara jafnvel trompa Lordi

Danska ríkissjónvarpið fjallar ítarlega um atriði Hatara á vef sínum í dag en fullyrt er að atriðið sé það umdeildasta í keppninni. Lýsandinn í danska sjónvarpinu segir Hatara jafnvel slá Finnunum í Lordi við en sveitin litríka vann Eurovision árið 2006 með lagi sínu Hard Rock Hallelujah.

„Þessi lest er farin út af sporinu“

„Ég sakna þeirra tíma þegar það var lagið sem skipti máli en ekki hver getur verið með umdeildasta atriðið“

„Mjög töff!!! Sleppið því að hlusta á leiðinlega danska lagið“

„LOKSINS einhver skemmtun! ... er orðin þreytt á þjóðlegum dönsum og pólitískum rétttrúnaði“

Þessi ummæli eru meðal þeirra sem valin eru í umfjöllun Hatara sem segja má að fjalli frá A til Ö um sveitina. Meira að segja er komið inn á hverra manna þeir Matthías, Klemens og Einar Hrafn eru eins og Vísir hefur áður fjallað um.



Er nefnt að líklega hafi fleiri en einni ömmu eða barnafjölskydlu svelgst á kaffinu þegar íslenska atriðið með BDSM-búninga sína á lofti stigu á svið á 'prime-time' í sjónvarpi. Þeir gætu meira að segja fengið fyrrnefnda Lordi til að líða illa. En atriðinu fylgi boðskapur sem liðsmenn Hatara hafa útskýrt margoft.

Ef ekki finnist lausn svo skapist friður þá muni Hatrið sigra.