Tiger mætir úthvíldur á PGA-meistaramótið

PGA-meistaramótið hefst í dag og Tiger Woods náði aðeins að spila níu æfingaholur fyrir mótið. Hann kaus að hvíla í gær á meðan aðrir æfðu.

Umboðsmaður Tigers sagði að Tiger væri hvorki meiddur né tæpur. Hann hefði verið búinn að undirbúa sig vel og ekki þurft að spila í gær.

Þetta er annað risamót ársins en eins og flestir muna gerði Tiger sér lítið fyrir og vann Masters-mótið á dögunum.

Það sem fær fólk til þess að efast um hvort Tiger sé alveg líkamlega heill er sú staðreynd að hann ætlaði að spila níu holur í gær og kylfusveinninn hans beið eftir honum á vellinum. Aldrei lét þó Tiger sjá sig.

Þetta kemur allt saman í ljós á eftir en mótið er í beinni á Stöð 2 Golf og hefst útsending frá mótinu klukkan 17.00.