Ágætis byrjun í Varmá

Veiði hófst í dag og nokkur fjöldi veiðimanna er staddur á sjóbirtingsslóðum þar sem reynt er að setja í fyrstu fiska veiðitímabilsins.

Ein af vinsælli vorveiðiám síðustu ára er Varmá en eftir að hert var á veitt og sleppt reglum í henni hefur veiðin verið að koma vel til baka. Halldór Gunnarsson í Flugubúllunni er staddur við Varmá ásamt félaga sínum og eru þeir komnir með sex fiska á land í dag í nokkuð erfiðum skilyrðum. Eins og sést á myndunum er ansi sólríkt fyrir austan en það gerir það að verkum að fiskurinn er mjög var um sig.

Samkvæmt Halldóri eru þessir fiskar sem þeir eru búnir að landa 40-65 sm langir. Það er nokkuð líf á svæðinu en eins og áður segir er fiskurinn mjög var um sig í þessum skilyrðum. Þeir félagar hafa ekki veitt stórt svæði í dag og eru bara búnir að veiða við bakkana en ætla sér að halda áfram í dag og það verður fróðlegt að heyra frá þeim í lok í dags.