Myrtu börn sín þegar þær óku bílnum fram af kletti

Ljóst þykir að hjón hafi vísvitandi orðið sér og sex börnum sínum að bana þegar þær óku bíl, með fjölskylduna innanborðs, fram af kletti í Kaliforníu í Bandaríkjunum í mars í fyrra. Þetta kemur fram í niðurstöðum rannsóknar dánardómstjóra á slysinu.

Hjónin, Jennifer og Sarah Hart, óku bílnum fram af klettinum nokkrum dögum eftir að barnaverndaryfirvöld hófu rannsókn á meintri vanrækslu þeirra á börnunum sex, sem öll eru ættleidd. Talið er að konurnar hafi flúið heimili sitt með börnin strax eftir heimsókn barnaverndarstarfsmanna.

Lík Hart-hjónanna fundust í bílnum við rætur klettsins. Lík fimm barna þeirra fundust ýmist við bílinn eða í sjónum nokkru síðar. Lík sjötta barnsins, hins fimmtán ára Devonte, hefur enn ekki fundist.

Fram kom fyrir dómi að Sarah hafi leitað að „drukknun“ á Internetinu áður en þær lögðu af stað og að Jennifer, sem sat við stýri, hafi vísvitandi stigið á bensíngjöfina og hraðað bílnum í átt að klettinum. Þannig hafi ekki verið um að ræða slys heldur morð.

Fólk með sjálfsvígshugsanir er minnt á Hjálparsíma Rauða krossins, 1717, og netspjallið. Þjálfaðir og reynslumiklir sjálfboðaliðar á öllum aldri svara þeim símtölum og spjöllum sem berast. Fullum trúnaði er heitið.

Nánari upplýsingar hér.