Wales byrjar undankeppnina vel | Öruggt hjá Rússlandi

Wales fer vel af stað í undankeppni EM 2020 en í dag vann velska liðið 1-0 sigur á því slóvakíska á heimavelli í E-riðli.

Daniel James, leikmaður Swansea City, skoraði eina mark leiksins strax á 5. mínútu. Hann vann þá boltann rétt fyrir utan vítateig og þrumaði honum í netið.

Fleiri urðu mörkin ekki og strákarnir hans Ryans Giggs fögnuðu góðum sigri.

Í I-riðli vann Rússland öruggan 0-4 sigur á Kasakstan á útivelli.

Denis Cheryshev skoraði fyrstu tvö mörk Rússa og lagði það þriðja upp fyrir Artem Dzyuba. Fjórða markið var svo sjálfsmark Abzals Beysebekov, varnarmanns Kasaka.

Góður sigur hjá Rússum sem töpuðu 3-1 fyrir Belgum í fyrsta leik sínum í undankeppninni.