Sigur Rós sendir frá sér lúxuspakka í tilefni af 20 ára afmæli Ágætis Byrjun

Platan Ágætis byrjun kom út árið 1999 á Íslandi og vakti strax gífurlega athygli hér heima sem og erlendis. Var platan svo gefin út árið 2000 í Bretlandi og kepptust tónlistartímarit og gagnrýnendur við að lofa plötuna í kjölfarið.

Í tilefni af því að í júní eru 20 ár liðin frá útgáfunni kemur út glæsilegur kassi sem inniheldur meðal annars sjaldgæft og áður óútgefið efni. 

Hljómsveitin hefur undanfarin ár undirbúið útgáfuna og farið í gegnum gamalt efni og fundust í því ferli meðal annars demó og lög sem ekki rötuðu á plötuna á sínum tíma, og sem liðsmenn höfðu meðal annars gleymt að væri til. 

Í þessari útgáfu er að finna 7 vinylplötur, 84 bls. bók og 4 geisladiska. Þess má geta að fyrstu 1999 eintökin af kassanum verða númeruð.

Útgáfudagur er 21. júní en hægt verður að panta eintak núna á www.sigurros.com