Önnur lægð á leiðinni

Djúpa lægðin sem olli ofsaveðri í gær er enn skammt suður af landinu og á leiðinni suðaustur á bóginn. Lægir í kvöld en svo er von á annarri lægð, þó heldur grynnri. Gular viðvaranir eru enn í gildi á nær öllu landinu. Þær gilda fram undir hádegi á Suður-, Suðausturlandi og Breiðafirði en fram eftir degi og inn í kvöldið á Austurlandi, Norðurlandi eystra og Vestfjörðum.

Verulega hefur dregið úr vindi síðan í gær, að því er fram kemur í hugleiðingum veðurfræðings á vef Veðurstofu Íslands, en vegna lægðarinnar ríkir hvöss norðaustanátt í morgunsárið og sums staðar stormur eða rok. Víða verður snjókoma eða slydda fyrir norðan og austan og rigning við sjávarsíðuna, annars þurrt að kalla, en dregur síðan smám saman úr vindi og úrkomu.

Eftir miðnætti verður áðurnefnd lægð svo úr sögunni og lægir þá víðast hvar og rofar til. Íslendingar eiga þó von á annarri lægð, þó ekki jafn ofsafenginni og þeirri sem nú gengur yfir landið.

„Önnur lægð, heldur grynnri, er í farvatninu og fer hún inn á Grænlandshaf í nótt og síðan til austurs fyrir sunnan land. Lægðin veldur því að snýst í austan- og suðaustankalda með slyddu eða rigningu sunnan og austan til á morgun. Hægari vindar fyrir norðan og austan og úrkomulítið. Hiti víða 0 til 5 stig að deginum,“ segir í hugleiðingum veðurfræðings.

Vegir á Suðurlandi enn þá lokaðir

Vegurinn milli Jökulsárlóns og Lómagnúps var enn lokaður skömmu eftir klukkan sjö í morgun og sömu sögu var að segja um veginn milli Hvolsvallar og Víkur, samkvæmt upplýsingum á vef Vegagerðarinnar. Lokað er um Mývatns- og Möðrudalsöræfi og á Vopnafjarðarheiði. Þá er ófært á Fjarðarheiði og Vatnsskarði eystra.

Annars er greiðfært á flestum stöðum á landinu en víða er hálka eða hálkublettir á fjallvegum.

 

Veðurhorfur á landinu næstu daga:

Á miðvikudag:

Austan- og suðaustan 8-15 m/s og rigning eða slydda með köflum S- og V-lands, hvassast við ströndina, annars skýjað en él austast. Hiti 0 til 4 stig S-til, en annars kringum frostmark. 

Á fimmtudag:

Suðaustlæg átt, 8-15 m/s, hvassast á annesjum. Dálítil slydda eða snjókoma á V-landi, rigning með S-ströndinni, en annars úrkomulítið. Hiti víða 0 til 4 stig, en vægt frost NA-til. 

Á föstudag:

Austlægar áttir og slydda eða rigning syðst, en dálítil él í öðrum landshlutum. Hiti kringum frostmark. 

Á laugardag og sunnudag:

Útlit fyrir breytilega átt með snjókomu eða éljum á víð og dreif og fremur svalt veður. 

Á mánudag:

Líklega vaxandi sunnanátt með rigningu og hlýnandi veðri, en lengst af þurrt fyrir norðan.