Skriðan í Hítardal er féll í fyrra á að heita Skriðan

Berghlaupið mikla sem gekk fram í Hítardal í júlí í fyrra á að heita Skriðan samkvæmt tillögu örnefnanefndar. Þá hefur nefndin samþykkt að vatn sem myndaðist við Skriðuna ofanverða verði nefnt Bakkavatn.

„Nafnið Skriðan hefur verið notað af heimamönnum um hríð. Eins og fram kemur í bréfi sveitarstjóra er nafnið „lýsandi fyrir atburðinn, þjált í munni og málfræðilega rétt“ en auk þess er nafnið lýsandi fyrir náttúrufyrirbrigðið sjálft,“ segir í umsögn örnefnanefndar.

Sveitarstjórn Borgarbyggðar hefur samþykkt nöfnin tvö og fara þau nú til mennta- og menningarmálaráðuneytisins til endanlegrar staðfestingar.