Keppendur gera athugasemd við framkomu Hatara

Nokkur urgur virðist meðal keppenda í forkeppni Eurovision-söngvakeppninnar vegna framgöngu Hatara. Sem og utan þess hóps eins og Vísir hefur greint frá. Skarphéðinn Guðmundsson dagskrárstjóri RÚV staðfestir þetta.

„Okkur hafa borist athugasemdir við framkomu Hatara,“ segir Skarphéðinn. Hann vill ekki greina frá því frá hvaða keppendum athugasemdirnar eru komnar.

Brot við reglum varða brottvísun

Meðal keppenda eru þær skoðanir uppi að Hatari hafi gerst brotlegir við lög keppninnar þar, nánar tiltekið 10.2 um Siðferði. Þar segir að höfundar og þátttakendur þurfi að heita því að halda trúnað og hafa ekki í frammi ósæmilega hegðun sem getur sært blygðunarkennd áhorfenda eða annarra þátttakenda; komið óorði á Söngvakeppnina, RÚV eða ESC.

„Textar, ræður eða látbragð/sviðshreyfingar af pólitískum eða svipuðum toga eru ekki leyfilegar í Söngvakeppninni eða ESC 19. Það sama á við um gróf blótsyrði eða annað óviðunandi orðbragð í lagatextum. Einnig er óheimill allur áróður eða annað í þeim dúr í lagatextum eða sviðsetningu laga í Söngvakeppninni eða í ESC 19. Brot á þessari reglu getur leitt til brottvísunar úr keppni,“ segir í þessari grein reglnanna.

Ljóst er að viðurlög við brotum af þessu tagi eru ströng: Brottvikning. Meðlimir Hatari hafa sagst vilja nota dagskrárvaldið sem í þátttökunni felst til að koma pólitískum skilaboðum á framfæri. En, þá er þetta spurningin hvort hægt sé að heimfæra það uppá atriðið sem slíkt?

Keppnin skuli ekki vera pólitískur vettvangur

Skarphéðinn segir að sem dagskrárstjóri eigi hann í reglulegu og góðu samtali við höfunda og flytjendur um ýmislegt sem að keppninni snýr.

„Fæ meðal annars sendar athugasemdir í tölvupósti og tillögur að því sem betur mætti fara - nokkuð sem við í senn tökum fagnandi, alvarlega og til athugunar, því þannig teljum við að hægt sé að gera góða keppni ennþá betri. Ég lít svo á að þessi samskipti fari fram í fullum trúnaði, séu eðlilegur hluti af slíku samstarfi og get því hvorki staðfest hverjir hafi verið í bandi eða hvert innihald samskiptanna hafi verið,“ segir Skarphéðinn í samtali við Vísi.

Skarphéðinn vísar til þess sem hann hefur áður sagt að Söngvakeppnin, rétt eins og Eurovision, skuli aldrei vera „pólitískur vettvangur jafnvel þótt keppendur bæði fyrr og nú hafi með ýmsum hætti reynt, beint eða óbeint, að koma áleiðis einhvers konar boðskap sem einhverjir hafi túlkað sem pólitískan. Þegar slíkt gerist eru keppendur minntir á reglur keppninnar. Allir höfundar og þátttakendur í Söngvakeppninni í ár hafa heitið því að fylgja reglum keppninnar og er samhljómur um að gera keppnina hina skemmtilegustu fyrir landsmenn.“

Barði segir Söngvakeppnina skemmtiþátt

Samkvæmt heimildum Vísis er einn þeirra sem gert hefur athugasemdir við pólitískar skírskotanir Hatara Barði Jóhannsson sem er með lag í keppninni, það sem Elli Grill, Skaði og Glymur flytja: Jeijó, keyrum alla leið. Barði vildi þó ekki kannast við neitt slíkt þegar Vísir spurði hann út í þetta.

„Mér finnst atriði Hatara vel útfært atriði í sjónvarpi og hef ekkert annað en gott um það að segja. Hið glæsilegasta atriði.“

En, er það þín skoðun að RÚV ehf. ætti að framfylgja þessum reglum 10.2 og þá til hins ýtrasta?

„Ég var beðinn um að semja lag í skemmtiþátt í sjónvarpi og leitast við hressleika í tjáningu. Það pólitískasta sem ég hef farið í tónlist er að semja stefið í Silfur Egils,“ segir Barði. Og bætir við: „Ég lít ekki á Eurovision sem keppni, fyrir mér er þetta skemmtiþáttur í sjónvarpi og ég ákvað að taka þátt í honum sem slíkum. Ef mig langaði til Ísrael þá selur Wow ódýr flugsæti.“

Tengd skjöl:

Reglur Söngvakeppninnar 2019