Toppliðið missir einn sinn besta leikmann

Nýliðar KR í Domino´s deild kvenna í körfubolta hafa orðið fyrir miklu áfalli en landsliðskonan Unnur Tara Jónsdóttir spilar ekki meira með Vesturbæjarliðinu á þessari leiktíð.

Karfan.is segir frá því að um 2/3 hluta fremra krossbands hennar hafi trosnað í leik á móti Breiðabliki á dögunum. Þessi meiðsli þýða að hún verður ekkert meira með í vetur en þjálfarinn Benedikt Guðmundsson staðfesti þetta við síðuna.

Unnur Tara Jónsdóttir er að spila aftur í efstu deild eftir langa fjarveru en hún hjálpaði KR að komast upp í efstu deild í fyrra í vetur.

Á þessu tímabili hefur Unnur Tara verið með 8,7 stig og 6,4 fráköst að meðaltali en auk þess að vera besti íslenski leikmaður KR-liðsins þá hefur hún verið einn allra besti varnarmaður Domino´s deildarinnar.

Unnur Tara skoraði 19 stig á 22 mínútum í þessum afdrifaríka leik á móti Blikum en hann fór fram 6. febrúar síðastliðinn.

KR lék án Unnar á móti Skallagrími í leiknum á eftir og vann þá 80-64 sigur. Liðið hélt því toppsæti sínu í deildinni en KR-konur eru í harðri baráttu við Keflavík og Val um deildarmeistaratitilinn.

Þetta er líka missir fyrir landsliðið en Unnur Tara var búin að vinna sér sæti í landsliðinu í vetur eftir átta ára fjarveru.