Herðir á frosti í kvöld

„Köld norðanáttin leikur enn um landið og ber éljaloft yfir norðurhelminginn, en miðhálendið heldur sunnanverðu landinu yfirleitt björtu og éljalausu,“ að sögn veðurfræðings. Hann bætir við að það muni þó draga smám saman úr vindi vestanlands og éljum nyrðra eftir hádegi. Frostið verður á bilinu 2 til 13 stig í dag en þegar líða tekur á daginn kólnar enn frekar.

Von er á hæðarhrygg yfir landið á morgun og mun víða létta til. Lægðardrag nálgist þó af Grænlandshafi með austanstrekkingsvindi og éljum á suðurhlutanum. Dragið gengur síðan yfir Suður- og Vesturland á sunnudag og snjóar þá með köflum á þeim slóðum, en helst bjart á Norðausturlandi.

Eftir helgi er síðan spáð umhleypingum með úrkomu af ýmsu tagi. Til að mynda er áætlað að hitinn verði í kringum frostmark um miðja næstu viku.

Veðurhorfur á landinu næstu daga

Á laugardag:

Hæg breytileg átt og víða léttskýjað, en stöku él við sjávarsíðuna. Frost 10 til 22 stig, kaldast í innsveitum nyrðra. Vaxandi austlæg átt með suðurströndinni síðdegis og þykknar upp, lítilsháttar snjókoma þar um kvöldið og dregur úr frosti.

Á sunnudag og mánudag:

Austlæg átt, 5-13 m/s og snjókoma á köflum, él við A-ströndina, en hægara og bjartviðri á NA-landi. Áfram talsvert frost, einkum fyrir norðan.

Á þriðjudag:

Vaxandi suðaustanátt, hvassviðri eða stormur með snjókomu, en síðar talsverðri slyddu og rigningu og ört hlýnandi veðri, en úrkomulítið og kaldara NA-til fram á kvöld.

Á miðvikudag:

Útlit fyrir austan- og norðaustanhvassviðri og snjókomu eða slyddu fram eftir degi, en síðan mun hægara og slydduél eða skúrir S- og A-til. Hiti kringum forstmark.

Á fimmtudag:

Líklega norðaustlæg átt, él víða á landinu og kólnandi veður.