Leik Selfoss og KA/Þór frestað til morguns

HSÍ hefur frestað leik Selfoss og KA/Þórs í Olísdeild kvenna í handbolta sem átti að fara fram í kvöld til morguns.

Það viðrar alls ekki til ferðalaga í dag samkvæmt veðurspám og segir í tilkynningu HSÍ að leiknum hafi verið frestað til morguns vegna samgönguörðugleika.

Leiknum var frestað um sólarhring, nýr leiktími er 20:00 annað kvöld, miðvikudaginn 6. febrúar.

Selfoss er á botni Olísdeildarinnar og þarf nauðsynlega að sækja sér fleiri stig í deildinni en nýliðar KA/Þór er í nokkuð góðum málum eftir frábæra byrjun á tímabilinu, í 5. sæti með 13 stig.