Ólafi William Hand sagt upp hjá Eimskip

Ólafi William Hand, upplýsingafulltrúa og forstöðumanni markaðsmála á alþjóðasviði Eimskips, var sagt upp hjá fyrirtækinu í síðasta mánuði samhliða breytingum á skipuriti fyrirtækisins og ráðningu á nýjum forstjóra.

Viðskiptablaðið  greinir frá þessu. Ólafur hafði starfað sem upplýsingafulltrúi fyrirtækisins í um tíu ár.

Blaðið greinir frá því að Ólafur muni starfa að ákveðnum verkefnum hjá Eimskip fram á vor, en Elín Hjálmsdóttir mannauðsstjóri tekur við starfi upplýsingafulltrúa og Matthías Matthíasson, framkvæmdastjóri sölu- og markaðssviðs verður í forsvari fyrir markaðsdeildina.

Ólafur William var í lok síðasta árs dæmdur í tveggja mánaða skilorðsbundið fangelsi fyrir ofbeldi í garð barnsmóður sinnar, meðal annars fyrir að taka hana hálstaki. Forsaga málsins eru áralangar deilur Ólafs við barnsmóður sína vegna umgengnisréttar. Hann hefur áfrýjað dómnum til Landsréttar.