Körfuboltakonur segja frá reynslu sinni á súpufundi um heilahristing

Knattspyrnusamband Íslands og Íþrótta- og Ólympíusamband Íslands munu standa fyrir súpufundi um heilahristing í næstu viku. Tveir leikmenn úr Domino´s deild kvenna í körfubolta munu meðal annars segja frá reynslu sinni.

Súpufundurinn fer fram á þriðju hæð í höfuðstöðvum KSÍ á Laugardalsvelli. Viðfangsefnið er höfuðhögg/heilahristingur í íþróttum.

Þar mun Lára Ósk Eggertsdóttir Classens sem er læknir á bráðamóttöku halda fyrirlestur og Ragna Margrét Brynjarsdóttir, mastersnemi í sálfræði og María Björnsdóttir, sjúkraþjálfari, segja reynslusögur, en þær eru báðar körfuboltakonur sem fengu heilahristing í fyrra.

Landsliðsmiðherjinn Ragna Margrét Brynjarsdóttir er nýbyrjuð aftur að spila með Stjörnunni í Domino´s deild kvenna en María Björnsdóttir er ekki enn byrjuð að spila með Snæfelli.

Frítt er á viðburðinn og boðið verður upp á súpu og brauð. Það þarf hins vegar að skrá sig sem er hægt hér.

Viðburðurinn veitir 2 endurmenntunarstig til þeirra þjálfara sem eru með UEFA/KSÍ A eða UEFA/KSÍ B þjálfararéttindi.

Sýnt verður beint frá fyrirlestrinum á miðlum KSÍ.