Ísland fer með tíu manns á heimsmeistaramótið í utanvegahlaupum

Frjálsíþróttasamband Íslands sendir fjölmennan hóp á heimsmeistaramótið í utanvegahlaupum í ár en mótið fer fram í sumar.

Alls munu tíu Íslendingar, fimm karlar og fimm konur, keppa á HM sem fer fram laugardaginn 8. júní 2019 í Miranda do Corvo í Coimbra í Portúgal.

Langhlaupanefnd FRÍ tilkynnti um val á landsliðinu í frétt á heimasíðu Frjálsíþróttasambandsins.

Þetta er í níunda sinn sem heimsmeistaramótið í utanvegahlaupum fer fram en það fór fram á Spáni á síðasta ári. Ísland átti þá átta keppendur og sex þeirra kláruðu.

Bestum árangri náði Sigurjón Ernir Sturluson sem varð í 121. sæti en Daníel Reynisson (190. sæti) var einnig á topp tvöhundruð.

Ragnheiður Sveinbjörnssdóttir náði bestum árangri íslenskra kvenna þegar hún varð í 86. sæti í kvennaflokki og 230. sæti samanlagt. Þórdís Jóna Hrafnkelsdóttir varð í 95. sæti í kvennaflokki og í 248. sæti samanlagt.

Sigurjón Ernir Sturluson og Þórdís Jóna Hrafnkelsdóttir verða bæði með næsta sumar en það verða einnig Elísabet Margeirsdóttir og Guðni Páll Pálsson.

Keppendur Íslands á HM 2019 eru:

Konur

Rannveig Oddsdóttir

Elísabet Margeirsdóttir

Anna Berglind Pálmadóttir

Þórdís Jóna Hrafnkelsdóttir

Melkorka Árný Kvaran

Karlar

Þorbergur Ingi Jónsson

Guðni Páll Pálsson

Ingvar Hjartarsson

Örvar Steingrímsson

Sigurjón Ernir Sturluson