Nældu sér í hræódýra miða á fyrsta farrými vegna mistaka flugfélagsins

Flugfélagið Cathay Pacific segist ekki ætla að fara fram á að viðskiptavinir, sem nældu sér í flugmiða á fyrsta farrými á spottprís, greiði fullt verð fyrir miðana.

Um er að ræða miða í flug á milli Víetnam og New York, fram og til baka, í ágúst næstkomandi sem viðskiptavinirnir greiddu um 675 bandaríkjadali fyrir, eða um 78 þúsund íslenskar krónur. Það þykir lágt að sögn breska ríkisútvarpsins, ekki síst í ljósi þess að sambærilegir miðar í júlí og september kosta 16 þúsund dali, rúmlega 1,8 milljónir króna.

Flugfélagið viðurkennir að hafa gert mistök en segist engu að síður ekki ætla að fara fram á að hinir heppnu viðskiptavinir greiði mismuninn. Ekki liggur fyrir hversu margir keyptu umrædda miða en upp komst um verðlagninguna á gamlársdag og var verðið leiðrétt samdægurs.

Happy 2019 all, and to those who bought our good - VERY good surprise 'special' on New Year's Day, yes - we made a mistake but we look forward to welcoming you on board with your ticket issued. Hope this will make your 2019 'special' too!
.#promisemadepromisekept #lessonlearnt

— Cathay Pacific (@cathaypacific) January 2, 2019

Mistökin eru sögð kóróna erfitt rekstrarár hjá Cathay Pacific, sem hefur verið rekið með tapi undanfarin tvö ár. Félagið, sem gerir út frá Hong Kong, er sagt hafa átt erfitt með að bregðast við síharðnandi samkeppni í fluggeiranum, ekki síst með tilkomu fjölda lággjaldaflugfélaga í Suðaustur-Asíu.

Þá rataði flugfélagið í fréttirnar í september síðastliðnum þegar það neyddist til að senda eina vélina sína aftur í sprautun. Ástæðan var innsláttarvilla í nafni félagsins, fyrir vikið stóð „Cathay Paciic“ á vélinni.

Mánuði síðar var gerð tölvuárás á höfuðstöðvar flugfélagsins og náðu tölvuþrjótar að stela persónuupplýsingum næstum 9,4 milljón viðskiptavina Cathay Pacific.